東歐之旅 - 回憶中的布拉格 (一) 🇨🇿 ✈️ 2011

2011年嘅歐洲之旅, 到個部落格都關閉都未寫完, 所以開左呢個新 blog 都想寫返。

當時懷住緊張又興奮嘅心情同 Kathy 十日嘅自由行 , 當日我地零晨12 點左右上機 , 我地首先要搭六個多鐘機到杜拜 , Emirates 呢一架機真係好舒服 , 座位好寬闊 , 食物都不錯 , 下一次有機會一定要搭呢間 .... 讚。呢程舒適嘅飛機好快就到左杜拜 , 不過到左仲要係機場等大約四個鐘 , 大家都非常攰 , 我記得當時仲係感冒未好 >_<

終於搭第二程機, 我都係第一次座咁長途嘅飛機 , 大約搭七個多鐘嘅時間我地就到美麗嘅布拉格 , 當時真係好興奮。我地出左閘 , 跟住搵下有咩車可以直接到酒店 , 之後我地步出機場見到出面雨紛紛 , 感覺氣溫大約得 15 - 16 度左右 , 估唔到七月份嘅天氣都咁涼。

我地上左一架類似小巴嘅車大約一個鐘就到酒店附近 , 不過我地落左車仲落緊微雨 , 每人攞住一個大行李加一個行李袋 , 認真狼狽 , 我地停低查看旅遊書想問周圍嘅人知唔知點去酒店 , 點知問左成三、四個人都唔知點去 , 我地開始有啲焦急 >_< , 不過好在最後問左一間商店老闆先知道點去。終於到左酒店 , 雖然係一間小酒店 , 但裝飾得非常精緻 , 很有波希米亞格調 , 呢次旅行共住左四間酒店 , 呢一間係最鍾意 , 真係好舒服 , 簡單設計 , 以米白色為主 , 窗外見到舊城廣場嘅提恩教堂 , 真係太讚。我地放好行李爭取時間係附近參觀 , 好鐘意呢個地方嘅建築物 , 真係好靚。