Love ☆ Life ☆ Music

        第一次整聖誕木頭蛋糕 , 其實好多年前已想做呢個蛋糕 , 因為覺得自己做卷蛋一直都無把握 , 最近係網上見到影片教學 , 所以籍住聖誕就試下做 , 朱古力卷蛋糕 , 用左香蒂莉忌廉 (Crème Chantilly) ,忌廉夾住黑朱古力核桃碎 , 外層樹皮係用朱古力牛油忌廉 。     原來每到年尾 , 係傳統法國習俗中，聖誕節去拜訪親友時，法國人會帶堅硬的木頭當做伴手禮，意思係祝福對方一整年都幸運 , 一路演變到而家就變成送木頭蛋糕作為一種祝福。      

 ▼  用雪過嘅蛋再回室溫, 第3次做都係摸索中 , 可能雪過嘅蛋水份比較多,  封乾時間唔夠, 表面裂開, 就算有啲無裂開裙邊好細小 。   ▼第一次真係慘不忍睹 , 睇資料唔夠就去試做 , 搞到過稀, 完全封乾唔到    ▼ 四張圖片都係同一個問題 , 按壓時過於用力 ,  導致杏仁出油 , 出爐後一陣先見到, 表面下陷, 脆弱 ▼ 兩張圖片係一同做, 用雪過嘅蛋再回室溫 ,  可能水份比較多, 左圖風乾時間唔夠所以表面爆裂 ,  右圖放置時間耐啲 , 表面風乾夠 , 焗出黎係天壤之別, (右圖係冷氣房放置1小時15分鐘先完全風乾)

  雖然算係做到，但係之後再做都好反覆,有好多細節嘅嘢都要留意，食譜嘅份量，打蛋白狀態，拌麵糊手法，麵糊嘅程度，焗爐嘅溫度，仲有好重要嘅天氣嘅濕度，做錯一個步驟可致失敗。     所以將自己留意到嘅記事📖一下     ✏️留意濕度：  ✏️ 過篩杏仁粉唔好用力壓, 做出黎嘅馬卡龍好易餅面出油而脆弱和下  ✏️室溫蛋白 ,亦試過用雪過嘅蛋再用暖水坐暖 , 風乾時間比較長(在冷氣房) , 用左1小時間15分鐘。  ✏️蛋白打至微挺可加入膏狀色素， 蛋白打至硬性發泡（想打硬要小心好容易打過龍😅），打至蛋白霜呈尖而短嘅狀態，蛋白有清楚嘅紋路 (大約打3分鐘左右)。  ✏️分2次加入已過篩的杏仁粉和糖霜，拌麵糊手勢，用切拌法，不要搞拌，拌勻無見粉狀後，非常温柔嘅力沿邊推壓幾下再刮回中心，不時留意麵糊狀態，如刮起麵糊流下很慢代表太濃稠，如流得太快即拌過度，刮起要慢慢流下似柔軟嘅絲帶狀。  ✏️焗馬卡龍時最好放一個底盤烘焗，如直接用底盤容易會烤上淺啡色嘅顏色, 用唔同焗盆烘焗用嘅溫度同時間都唔一樣...(比較傷腦筋)    ✏️在冷氣房風乾大約 1小時10分鐘左右 (室溫濕度50%與冷氣房風乾時間相約)                     ▼ 做左第12次終於做到外脆內軟   ▼食用色素做馬卡龍必備        ▼慢慢流下似柔軟嘅絲帶狀  ▼流得太快即拌過度 材料：  大約24片（12個）   室溫蛋白 40 g（預備2隻蛋）   幼砂糖  36g   ————————————   純糖霜 52g     特幼杏仁粉52g (過篩後份量)   色素1-2滴

        試做唔同餡料, 都係用牛油忌廉去做變化, 做出自己鍾意嘅口味, 青檸同檸檬比較 ,          覺得青檸比較突出配落去甜甜嘅馬卡龍好清新,亦令餅可減低甜度。       

      今次好開心搵到馬卡龍外脆內軟嘅溫度 , 焗爐溫度170焗用左8分鐘左右 , 再轉火155度焗剩下嘅分鐘4分鐘 , 關火後用爐嘅餘溫悶3分鐘左右 (爐門留空隙疏氣)不過每次都要記錄濕度 , 風乾時間, 因為有時少少差錯就影響到不成功 。

每次都試用唔同焗盆 , 呢一次隨手攞左個卷蛋盆 ,  好有驚喜 , 因為終於焗出黎裙邊無上色 , 應該成功 ,  不過餡料先係餅嘅精髓 , 所以要慢慢學習做唔同餡料     ▼ 焗爐溫度170焗用左7分鐘 , 再轉火155度焗 5分鐘, 食起黎外面少少脆 內面軟 , 可以再調教溫度

                 看似以為成功 , 但烘焗溫度太低 , 食起淋淋地 ,140度焗嘅溫度太低 , 真係奇怪, 唔明白第一次成功都係同一度數 , 點解焗出黎差咁遠, 所以覺得溫度一定有問題 , 所以就慢慢加溫度 , 每一次都係重要嘅過程。  

  諗起2013年成功做到幾次義式馬卡龍， 之後再嘗試做失敗過幾次，於是便放埋一邊。事隔幾年，見到網上教學，法式做法無咁繁複，所以就再挑戰一下。     雖然呢一次算係做到，但係有好多細節嘅嘢都要留意，食譜嘅份量， 打蛋白狀態，拌麵糊手法，麵糊嘅程度，焗爐嘅溫度， 仲有好重要嘅天氣嘅濕度，做錯一個步驟可致失敗。    ▼ 做到成功果刻真係好感動

         第一次試整檸檬海綿蛋糕，一直都搵唔到檸檬海綿蛋糕食譜, 所以宜接將平時用嘅海綿蛋糕食譜, 將奶嘅部份改為檸檬汁 , 加左一個檸檬皮 , 食起有微檸檬🍋味，要再試下點樣可以將檸檬味再突出多啲 , 蛋糕都食起黎都幾有質感 ,蛋糕面加左香蒂莉忌廉,仲有藍梅果醬 , 我姆鍾意呢個配搭　。